Shkolla si qendër e komunitetit synon të garantojë zhvillimin e qëndrueshëm dhe cilësor të komunitetit duke mundësuar kombinimin e arsimit formal me joformal të vazhdueshëm, promovimin e inovacionit dhe kreativitetit tek të rinjtë, krijimin e një ndërveprimi aktiv me dhe për komunitetin. Realizimi i komponentëve thelbësorë si: mësimdhënie alternative dhe të mësuarit aktiv, gjithë përfshirje në qeverisjen e shkollës dhe komunitetit, vullnetarizmi dhe solidariteti, rekreacioni dhe sporti, teknologjitë e reja të informacionit, krijimi dhe shpërndarja e përvojave dhe praktikave më të mira, inkurajon partneritetin dhe bashkëpunimin midis aktorëve për një mbështetje të tërë dhe alternative të të rinjve në një ekosistem arsimor për një zhvillim të qëndrueshëm.

Prania e prindërve në jetën e brendshme të shkollës krijon siguri, mbështetje dhe mbrojtje për fëmijët-nxënës. Kjo marrëdhënie ndikon fort në krijimin e sjelljeve dhe vlerave të duhura qytetare. Prindërit në shkollë mund të shfrytëzohen si burime të vërteta reale, njohjeje dhe shkencore. Pjesëmarrja e prindërve në menaxhimin e institucionit dhe zbatimin e ligjshmërisë në të, është një garanci për zbatimin e politikave arsimore, të rregullave dhe detyrimeve ligjore.

Mjedisi i të nxënit të shkollës duhet të mbështesë planifikimin dhe përfshirjen e interesave të komunitetit. Përreth fqinjëve të komunitetit të shkollës dhe familjeve të tyre krijohet siguri dhe rritet krenaria e komunitetit për shkollën. Arrihet një raport më i mirë bashkëpunimi midis nxënësve që kanë lindur aty me nxënësit e ardhur. Shkollat punojnë në mënyrë më intensive për përmbushjen e synimeve të tyre.

Shkolla miqësore për të gjithë dhe gjithëpërfshirja në mësimnxënie realizohet nëpërmjet bashkëpunimit të aktorëve qeversisës dhe shoqërisë civile. Nën moton “çdo fëmijë në shkollë” strukturat përgjëgjesë angazhohen dhe impenjohen së bashku në përmirësimin e politikave gjithëpërfshirëse, zhvillimin e standardeve dhe zbatimin praktik të tyre në ndihmë të të gjitha shkollave të arsimit bazë dhe fëmijëve.

Sipërmarrja lokale, që beson në vlerat që shkolla komunitare, do të përcjellë për komunitetin e zonës ku sipërmarrja operon, mbështet shkollat me financime dhe logjistikë si edhe inkurajon dhe nxit nxënësit të marrin pjesë në aktivitete të ndryshme vullnetare dhe rekreacioni. Afrimi i sipërmarrësve në shkollën komunitare ka gjithashtu rol kryesor në nxitjen e vullnetit të të rinjve kundrejt mundësive për karrierë dhe punësim.